“…እስካሁን ካነበብኳቸው የወግ መጽሐፎች ይሄኛውን የተለየ ነው እንድል ከሚያደርጉኝ ነገሮች መካከል የተመጠነ፣ የተወሰነ፣ እዛ እና እዚህ ሳይዝረከረክ፣ ሳይዝረበረብ ስለአንድ ርዕሰ ጉዳይ [የዩኒቨርሲቲ ሕይወትን] በሚያውቀው ልክ ለማብራራት እና ለመተንተን መቻሉ ነው።
… መጽሐፉ የወግ ስብስብ ነው። እነዚህ ወጎች ለየብቻ ራስ ራሳቸውን ችለው የቆሙ ናቸው። በጋራ ሲታዩ ደግሞ ይናበባሉ፣ ይዛመዳሉ፣ ይዋደዳሉ ሁሉም የሚያወራው የዩኒቨርሲቲ ሕይወትን ስለሆነ።
… ወጎቹ አንዴ ተኮሳትረን፣ አንዴ ፈገግ ብለን የምናነባቸው ከራሳችን ጋር የሚያጨዋውቱንና የሚያነታርኩን ናቸው። ሆኖም እያንዳንዱ ወግ መጣጥፍ ውስጥ ተመላልሶ የሚመጣ አንድ ዜማ አለ። ዜማው አዝማች አለው። አዝማቹ ደግሞ ሀገር ነው። ሀገሪቷ ኢትዮጵያ ናት። ደራሲው ኢትዮጵያ ህመሙ እንደሆነች ነው የምታዩት።”
ደራሲ ዶ/ር እንዳለጌታ ከበደ (ግንቦት 13 ቀን 2014 ዓ.ም መጽሐፉ በአዲስ አበባ ዩኒቨርሲቲ ሲመረቅ ከተናገረው የተወሰደ)

“…የቴዎድሮስ መብራት ‘ንሥር እና ምስር’ የሚለውን በዩኒቨርሲቲ አጸድ ውስጥና በአፍአም በዙርያው ስላለ ሕይወት የሚተርከውን መጽሐፍ በየትኛውም እድሜ የሚገኙ ሰዎች ሊያነቡት ተገቢ ብቻ ሳይሆን ግዴታም መስሎ ይሰማኛል።
አዛውንቶች ትዝታቸውን ለማመንዠክ፤ ወጣቶች ትላንትናቸውንና መጪውን ለመረዳትና ለመጓጓት ጭምር።
ልጅህን፣ ወንድምህን፣ እህትሽን፣ ጎበዝ ተማሪ እንድትሆን በምክር ሰበብ አትጨቅጭቃት፣ አትጨቅጭቂያት ‘ንሥር እና ምስር’ የሚለውን መጽሐፍ እንድታነብ ስጦታ ስጫት፣ስጣት። ምንን መጠንቀቅና ምንድን ማድረግ እንዳለባት ተዋዝቶ ታገኘዋለች። ዩኒቨርሲቲ አለመግባት ከሕይወት ገፅ መሰረዝ መስሎ እስኪሰማት ድረስ።
ቴዎድሮስ መጽሐፉን እንደ ንሥር አራቅቆ፣ እንደ ምስርም ተጠንቅቆ የሠራው መጽሐፍ ለመሆኑ ምስክርነቴን አንብበውና እመነው!”
ደራሲ፣ ገጣሚ እና ባለቅኔ ኤፍሬም ሥዩም (ሶሊያና) Jun 15 2022 (ሰኔ 8 ቀን 2014 ዓ.ም) በፌስቡክ ገጹ ላይ የጻፈው።